Inicio » Opinión » Entrevistas y Reportajes » El Amaneser Protejado por Sinko Anyos Mas Grasias a Yuri Sasson i La Kaza Muestra de Malaga

El Amaneser Protejado por Sinko Anyos Mas Grasias a Yuri Sasson i La Kaza Muestra de Malaga

Enlace Judío México e Israel.- Publikasiones komo El Amaneser pueden sovrebivir solo si los ke los finansian kontinuan a azerlo. No abasta solo tener abonados, kale un finansiamiento aparte para pueder kontinuar a publikar. El Amaneser es el suplemento mensual del Salom, el uniko periodiko de la komunidad judia de Turkiya.  El Amaneser es el uniko periodiko en el mundo ke se publika enteramente en Judeo-Espanyol. El piyonaryo, Aki Yerushalayim, ke se publiko por mas de 35 anyos, se serro malorozamente por manko de finansyasyon i personas ke puedan kontribuir.

KAREN G. ŞARHON/ ESTAMBOL

Todos konosen la situasion ekonomika ke domina muestras vidas en muestro pais i esto esta rezultando en los budjetos kortados. Se save muy bueno ke la primera koza ke se korta en los budjetos es la kultura. El Amaneser tambien estuvo en perikolo de serrarse unas kuantas vezes ama parese ke es una publikasion importante por algunas personas porke la primera vez fue apoyada por Jean Carasso z-l(Fransia) i kontinua ser apoyada por la organizasion Aki Estamos.

Ay mas de un anyo i medio ke estamos publikando el Meam Loez en El Amaneser (8 pajinas kada mez) en forma ke se pueda azer komo livro kuando se eskapa. Siguro ke publikar 8 pajinas adisionales es koste extra i esto fue un kargo demasiado para el Salom. Es djusto en el momento ke estavamos pensando komo tomar reklames para augmentar el revenido, ke Yuri Sasson, el prezidente de La Kaza Muestra, organizasyon fundada en Malaga, Espanya, aparesyo komo un andjelo.

Ya lo konosesh a Yuri Sasson de muestras aktividades en el Dia Internasyonal del Judeo-Espanyol/ Ladino en ke el partisipa kada anyo. Kada anyo, su institusion aze mas i mas kozas para la prezervasion i dokumentasion de muestra kultura. Yuri es de una parte de famiya turka (salimos paryentes imajinavos) i de otro parte meksikano. Mos konosimos por primera vez en una de las organizasyones “Erensya” en Espanya i mos izimos buenos ami-gos. El anyo pasado el fue el sponsor del livro de Matilda Koen-Sarano, “Djoha Ke Dizer. leste anyo, djusto en tiempo ke teniamos mas menester, mos disho ke sera el sponsor de El Amaneser por sinko anyos empesando de este anyo!

Normalmente, no munchos sefaradis se meten la mano a la aldikera para kitar paras para proyektos kulturales ama esto vyendo ke Yuri es uno de los raros. El tambien va ser sponsor de un grande livro de dichas i proverbos sovre kual estamos lavorando el Sentro entero para kitar a luz. Bueno ke ay personas komo Yuri Sasson ke dan importansia a la preservasion i dokumentasion de muestra lingua i kultura porke sin eyos, todo se va pedrer i desapareser. A munchos no les importa ke dispareska la kultura ama un puevlo sin kultura es un puevlo siego i mudo.

La Kaza Muestra i Yuri Sasson lavoran kon sefaradis en el mundo ke keren tomar nasionalidad espanyola. Sus pajina en Facebook (La Kaza Muestra) tiene mas de 200 mil segi-dores! Yuri es un ombre muy aktivo i yeno de enerjiya. El konose mas de 10 linguas, tipiko judio poligloto! El Dio ke le de salud buena i vidas largas para kontinuar su buen lavoro en la prezervasion de muestra lingua i kultura.

Munchas grasias, Yuri Sasson i munchas grasias La Kaza Muestra.

 

 

Fuente:el amaneser

Deja un comentario

Tu dirección de correo electrónico no será publicada. Los campos obligatorios están marcados con *